Belangrike Kennisgewings

‘n Stukkie Kerkgeskiedenis

In die jaar 2024 was dit presies twee eeue sedert die eerste “Algemeene Kerkvergadering” op 2 November 1824 in Kaapstad byeengekom het; die eerste uitdrukking van ons kerkverband. Destyds was dit 14 gemeentes en ‘n vergadering van 25 lede, en hulle het uit verskillende historiese agtergronde, teologiese tradisies en spiritualiteite gekom – breedweg, die Reformasie, maar daar was Nederlandse hervormdes, sendelinge uit die London Missionary Society, en Skots-Presbiteriane. Dít was ons diversiteit van die begin af. In die volgende vier dekades egter, sou daar deur demografiese migrasies, sosio-politieke verskille en ‘n breë teologiese geskil nie minder as drie kerkverbande tot stand kom (Hervormd in die ZAR, 1853; Gereformeerd rondom Potchefstroom en Burgersdorp, 1859; algaande ook ‘n Zendingskerk, 1857 en later), asook selfstandige NG Kerke in Natal, die Vrystaat en Transvaal… Maar in 1824, was ons nog almal één.

Die versugting is dat die herdenking van 200 jaar meer as net ‘n “onthou” sal wees. Die versugting is dat dit inderdaad herstel sal bring, heling en ‘n vind van mekaar in ons gedeelde roeping (waaroor daardie eerste kerkvergadering / sinode hartgrondig gepraat het).